Прирачник по граматика за шесто одделение

Прирачникот по граматика за основното образование има двојна цел. Првата цел е да се намали несразмерната застапеност на темите од наставното подрачје јазик, кои, по правило, се далеку помалку застапени во секој учебник по предметот Македонски јазик во основното образование во споредба со темите од наставното подрачје литература. Втората цел е квалитативно да се подигне рамништето на застапените теми, односно да им се овозможи на наставниците и на учениците пристап до повеќе и до посоодветни граматички информации. Тоа значи дека во овој прирачник се внимава на терминологијата во однос на возраста на учениците, а се зазема став и во однос на предвидените очекувања што составувачите на наставната програма ги имаат од учениците. Имено, се случува во наставната програма да се бара од учениците да совладаат материјал кој, се покажува, не го совладале ни дипломираните професори што ја составиле наставната програма. Во таа смисла, во овој прирачник се настојува содржините да бидат усогласени со можностите на учениците што ги наметнува нивната возраст. Сепак, мора да се има предвид дека еден дел од граматичките содржини предвидени за шесто одделение не можат да се упростат доволно за да може секој ученик да ги совлада без помош од наставникот. Клучно за прифаќање на содржините од областа јазик од страна на учениците е тие да не се усвојуваат под притисок. Тоа значи дека основната задача на наставникот треба да биде обидот да им ги доближи на учениците јазичните теми присутни во овој прирачник без да настојува учениците по секоја цена да можат тие податоци да ги репродуцираат. На пример, интерпункциските и правописните знаци се учат цел живот. Правилата за нивна употреба не се ниту единствени ниту едноставни. Секое нивно, макар и најмало, усвојување од страна на учениците е драгоцено. Секако, искуството на наставникот секогаш доаѓа до израз во наставата, па во најголем број случаи ова што е кажано во предговоров се подразбира. Авторот и издавачот се надеваат дека овој Прирачник по граматика, како дополнителна литература, ќе им биде корисен на наставниците и на учениците во образовниот процес и дека ќе придонесе за издигнување на јазичната култура на учениците. Тој се надоврзува на материјата застапена во „Правописен потсетник“ во издание на Просветно дело.