Разиграни бои, линии, форми за 4-5 години

За прв пат како дидактички средства за објаснување на ликовниот поим, презентација на ликовната техника и ликовните материјали за предучилишна возраст се воведуваат врвни ликовни дела соодветни за возраста на децата. Со ова на современ, актуелен и лесно разбирлив начин се приближуваат врвни ликовни вредности. Современите педагошки теории особено ја истакнуваат важноста на квалитетен материјал во воспитувањето на децата од најмала возраст како стабилна основа за нивниот натамошен интелектуален и емотивен развој и културно ниво. Ликовните активности поттикнуваат на развивање на способностите за класифицирање и меморирање, помнење, развивање на имагинацијата и креативност во изразувањето. – проф. д-р Фехим Хусковиќ. „Разиграни бои, линии, форми“ од проф д-р Маја Рауник Кирков претставува комплет по ликовно образование, за деца од 4 до 5 – годишна возраст, кој се состои од два дела: работни листови и „Прирачник за воспитувачи и родители“. Во првиот дел, работните листови се дидактички осмислени да бидат составен дел за стекнување основи на ликовното изразување и творење. Во нив се користат ликовни дела од светски познати ликовни автори кои се разбирливи за децата од 4 до 5 – годишна возраст, како според изгледот, така и според техничката изведба. Ликовните активности се во согласност со сознајните, емоционалните и моторичките моќности на децата од наведената предучилишна возраст. Составен дел од приложениот материјал е „Прирачник за реализација на ликовните активности за воспитувачи и родители“. Во него се опфатени повеќе од 70 различни активности кои се поделени во четири целини: цртање, сликање, моделирање-обликување и печатење. За секоја активност е обработена ликовна содржина, потребен материјал за реализација, како и методички осмислена постапка за работа со децата. Со овој обем (повеќе од 70 ликовни активности, богатството на идеи и методи за стимулирање на креативноста и имагинацијата) се овозможува комплетно осмислување на ликовниот ангажман кај децата во текот на целата година.