Секој има право да се храни здраво

Изданието СЕКОЈ ИМА ПРАВО ДА СЕ ХРАНИ ЗДРАВО е прво од ваков вид кое ги разгледува, потребите, можностите, интересите и склоностите на децата. Овој дидактичко – работен материјал, придружен со поезија и проза од реномираниот и популарен писател за деца Киро Донев, содржи иновативни структуирани елементи што соодветствуваат на возраста на децата од раната и предучилишната возраст. Во него се застапени неколку воспитно-образовни подрачја: култура на изразување и поведение, природа и околина, со тематски целини и содржини кои условуваат стекнување знаења и искуства за правилната исхрана при растењето и за здраво и безгрижно детство, што е и право во Декларацијата и Конвенцијата за ПРАВАТА НА ДЕЦАТА. – проф. д-р Никола Петров. Во време кога правилната исхрана ги преплавува сите медиуми, неодминлива е потребата децата и возрасните да добијат свој поетско-прозен и едукативен приказ на оваа тема. На начин близок до детето, со особена духовитост а сепак студиозно и речиси енциклопедиски организирано, во ова издание се распостила богата инвентивна опсервација. Во вашите раце е прирачник – книга за која слободно можеме да кажеме дека е вистински бонтон на правилната исхрана за децата. И во манирот на нејзиниот сеопфатен текст и впечатливите илустрации, може слободно да констатираме дека СЕКОЈ ИМА ПРАВО ДА СЕ ХРАНИ ЗДРАВО заслужува едно големо БРАВО. Советите дадени низ текстот, кој е целосно поддржан од илустрациите, веќе ја динамизираат темата во толкава мера што практично го трасираат патот кон вистинска реформа на исхраната на децата како важен предуслов за здрав и, пред сѐ, среќен детски живот. Ова издание е изготвено со цел да им помогне и на возрасните и на децата на забавен и интересен начин да го откријат вистинскиот пат кон правилната исхрана од најрана возраст. Во исто време претставува одличен прирачник за секој родител, воспитувач, едукатор или лекар кој сака да ги потенцира придобивките од правилниот начин на исхрана, особено кога станува збор за децата.