Тајното братство

Изданието „Тајното братство“ е напишано од авторката Мимоза Ристова и претставува роман за деца. Професор Смиле Смиленски е затворен во самицата во Шутка под обвинение дека примил поткуп за испит. Додека го апселе, Министерството за фауна на РМ не се погрижило да обезбеди привремен дом за неговото милениче, кучето Виктор. Кучето набргу го фатиле шинтерите и го затвориле во злогласниот азил за скитници – Рекиште. Во Рекиште се работи на проектот Ав-ав. Таму главната ветеринарка е, всушност, неверната сопруга на Министерот за фауна која ги злоупотребува фондовите, па наместо да ги лекува, таа ги егзекутира кучињата скитници. Ослободувањето на неправедно затворените Смиле и Виктор го овозможува братот близнак на Виктор, кучето Хектор. Тој со припадниците на тајното мистично братство, под раководство на гуруто Изди-Аве и бајачката Паладина, сите од кучешки род, изведуваат кучешка ритуална магија за ослободување на неправедно заробените и казнување на криминалците. Сите дејствија во врска со протагонистите (политичари, кучиња, ветеринари) се под надзор на последните модели од аудиовизулени технолошки иновации кои комуницираат со жолтото комбе, а во кое работи тајниот агент на ЦИА.