МАТЕМАТИЧКА ИСКРА

Прв број Драги пријатели, Пред вас е првиот број на новото списание Математичка искра, наменето за учениците од второ до петто одделение. Целта на ова списание е да ви овозможи да ги проширите своите математички знаења, да се подготвите за натпреварите по математика, но и да се забавувате учејќи математика. Токму затоа, во секој број од нашето и ваше списание ќе најдете математички четива, задачи за подготовка за математички натпревари, задачи за проверка на стекнатите знаења, но и забавни содржини кои се поврзани со кралицата на науките, односно, со математиката. Се надеваме дека нашето дружење ќе ви овозможи во иднина подобро да ги усвојувате новите училишни содржини, како и дека ќе придонесеме да ја засакате математиката.