НИЗ СТРАНИЦИТЕ НА ЛЕКТИРАТА – IV одделение

Активности за обработка на лектира за четврто одделение м-р Весна Недановска Валентина Ангелковска Драги ученици, Честитки! Веќе сте во четврто одделение. Досега сте прочитале многу лектири. Да ве потсетиме дека лектирата е одбрана литература за деца која ќе ја разбуди вашата љубопитност и во нејзино друштво ќе поминувате убави и креативни мигови. Со читањето лектири ќе развивате вештина за брзо читање и ќе го збогатите речникот на изразување со нови зборови. Лектирите ќе ја разбудат вашата фантазија, ќе ви овозможат да се запознаете со многу нови и интересни ликови. Ќе ве однесат на нови егзотични места со нови култури. Читањето лектири ќе ви помогне да градите нови знаења, да ги почитувате различностите и ќе ве подготви за иднината. Се надеваме дека лектирите ги прочитавте за време на летниот распуст и со нетрпение сакате прочитаното да го споделите со вашите другарчиња. За да ви бидат позабавни часовите по лектира, ние ви подготвивме интересни и креативни активности. Ви посакуваме незаборавно патување низ страниците на лектирите. Авторките