НИЗ СТРАНИЦИТЕ НА ЛЕКТИРАТА – V одделение

Драги ученици! Искачени на петтото скалило од основното образование, ќе се сретнете со многу активности и важни сознанија, кои ќе ви помогнат да се стремите кон достигнување на уште повисоки цели. Наставното подрачје „Читање литература и лектира“ е многу значајно подрачје. Читајќи се сретнувате со различни настани, предели, сцени, ситуации, ликови, описи, слики, дијалози… Ги доживувате секој на свој начин. Развивате критичко мислење, дискутирате, анализирате, доаѓате до одредени заклучоци… Веруваме дека секоја прочитана страница ќе ви биде предизвик да ја свртите следната. Со таквата насоченост и критичка љубопитност, со посебноста во доживувањето на прочитаното, можеби, и ќе се зближите со позитивните ликови во литературното дело, а ќе се оддалечите од негативните ликови и постапки, ќе извлечете поуки и пораки кои ќе ви бидат корисни во секојдневниот живот. „Низ страниците на лектирата“ ќе ви помогне уште подобро да ги доживеете, да ги разберете и да ги усвоите етичките и естетски вредности на литературното дело.