Весело читање

Да се развива интересот за книгата како извор на учење е цел на секој родител, а подоцна и на секој учител. И со овој прирачник имаме намера да ја постигнеме таа цел кај вашето дете, како и повеќето цели зацртани со наставната програма за прво одделение. Љубовта кон читањето кај децата се развива од најмала возраст. Читајте им на вашите ученици и деца. Обидете се да ги заинтересирате за текстовите со претходно водење на мотивациски разговор што е близок до темата на текстот. Разгледувајте ги страниците на Веселото читање и зборувајте за илустрациите. Подоцна читањето треба да е постојан начин на учење и комуникција за нив. Затоа е важно правилно да ги насочуваме и во читањето да ги воведуваме. Се надеваме дека понудениот избор на разновидни текстови прилагодени на возраста ќе придонесе за успешна реализација на зацртаните цели.